Hainbat 3X3 txapelketa

ZASTek, Zarautz Kirol Elkarteko saskibaloi atalak, urtero-urtero hainbat 3x3 Txapelketa antolatzen ditu. Benjaminetatik hasi eta seniorrak bitarteko txapelketak izaten dira.

Nabarmenena uda garaian antolatzen den txapelketa da. Urte asko dira dagoeneko lehen txapelketa hura antolatu zenetik. Hala, egun batzuetarako behintzat, Zarauzko Damatik Desertu Txikira bitarteko itsas-pasealekuko zatia saskibaloiak koloreztatzen du urtea joan eta urtea etorri. Neskak, mutilak, haurrak, helduak, maila altuko saskibaloi jokalariak, urtean behin jokatzen dutenak... Guztiek izaten dute tokia Zarauzko 3x3 txapelketan. Lehiaketa eta lagunarteko giroa, dena uztartzen da bertan.

Xarma berezia izaten duen txapelketa Koadrilen artekoa bada ere, berezia da jokalari asko malekoitik pasa ondoren gorengo mailan ikustea ere. Baina partaidetza ez da saskibaloi jokalarietara mugatzen. Boluntario, babesle eta epaileek ere, urtea joan eta urtea etorri txapelketa berezi hau aurrera eramatea posible egiten dute.

Dena dela, uda garaiko 3x3az aparte, abenduan, Orioko San Nikolas jaiekin bat eginda, Orioko 3x3 Txapelketa ere antolatzen du ZASTek Orioko Herri Ikastolarekin batera. Izaera geroz eta herrikoiagoa eta parte-hartzaileagoa duen txapelketa da Oriokoa, festetan kirola egitea posible dela argi uzten duena.